Aldri meir muffens med muffins

Sist veke var det som kjent 7-årsdag her i huset,
og de kunne sjå bilete av desse nokså pene "Hello Kitty-muffinsane"
(Hermeteikna er fordi eg absolutt ikkje er nokon pyntar....)

MEN, bildet bedreg! Dei var ikkje etande for folk.

• 
  Som vanleg var muffinsbaksten mislukka.
• Som vanleg hadde eg tredobla oppskrifta.
• Som vanleg var det noko muffens med meg og muffins.
• Som vanleg tenkte eg på ein kollega og hennar Perfekte Muffins....

Eg klarte å besinne meg og ikkje ringje til kollegaen min klokka over midnatt.
Og samla tankane såpass at eg forstod at barnebursdagen ikkje gjekk fløyten fordi om muffins mangla blant kakene.

På jobb to dagar etter, fekk eg sikra meg at kollegaen sendte meg oppskrifta si, oppskrifta på dei Perfekte Muffinsane.

Og i dag var D-dagen for meg og muffins. Om eg ikkje lykkast med kollegaen si oppskrift, bestemte eg meg for å verkeleg gi opp muffinsbakinga.

(Her må eg skyta inn, i all beskjedenheit, at eg egentleg er ganske flink å få til bakst, og eg likar å styra og stella på kjøkkenet, så eg er ikkje heilt blank på området)

Og under over alle under som Bjørn syng, oppskrifta virka!

Eg fekk til muffins! Dei var ikkje rå. Dei var ikkje tunge. Dei heva seg og nærmast velta over forma. Dei var etande :-)



Då måtte eg forta meg å få på glasur til dei tre skiløparane mine kom att frå skirenn. (Og ikkje sjå på pyntinga, fortsatt mykje å læra på det området, om eg gidd......)
Og dei var overvelda over at eg, mamma, hadde klart å bake sååå gode muffins.



Jippi ai ai. Oppskrifta skal settast i glas og ramme. Aldri meir muffens muffins på mitt kjøkken!

PS! Lurar du på kva som skjedde med bursdagsmuffinsane frå sist veke?
Etter at bursdagsbarnet sirleg har tatt bort papirforma på ca 100 mislykka muffins, ga ho dei til sauene, og dei slukte dei med velbehag (Det er da noko....).

THE HAPPY END OF THE MUFFINS STORY ;-)

Bursdag i ein fei

I morgon fyller yngstedamen 7 år!?

Og det har vore nedteljing sidan før jul til denne dagen, der ho laga til eit ark med nokon og 70 ruter og så klipte bort ruta med det høgaste talet kvar dag. Då hadde ho kontroll på kor mange dagar det var att til 19. januar!

Men så vart det rasfare og stengte vegar i helga, og det var uvisst om dagen kunne feirast med vener og onkel & co. Vi byrja å førebu ho på at det kanskje vart feiring "berre" med oss og dei i Solbakken. Ho tok det veldig tappert og fint, store lille jenta. Lurte berre på korleis det gjekk med pakkane som kjem i posten, men då vi sa at dei kom fram så snart dei fjerna bommen, var det ok òg.

Heldigvis opna vegen i dag kl 12, og ho fekk vera ein time på skulen og endeleg dela ut invitasjonane. Då ho kom heimatt gjorde ho tapt skulearbeid i ein fei, og i kveld har ho dekka på 16 kuvertar og tenkt nøye gjennom bordplasseringa.

Ho forstår at det fortsatt ikkje er sikkert at alle ungane kjem, fordi foreldra er skeptiske til ras-strekninga mellom Skjolden og Sørheim. (Og vi har full forståelse for det!)

Men ho får

- prosesjon på senga med song, kake med lys, og gåver

- vera på skulen for første gong på ein bursdag

- leika med andre ungar i snøen og grilla pølser på bål + marshmellows, sjølvsagt ;-)

- opna gåver og vera i fokus ein heil dag

- eta gele, muffins, marsipankake og sjokoladekake som ho har bestilt
- kveldsbesøk av onkel & co og andre naboar og vener

Då vi hadde vore inne på Skjolden i dag og følt oss heilt trygge etter vegen (og fått kjøpt inn fløyte og anna til bursdagskaker), bestemte vi oss for at vi held selskap på dagen som ho ynskjer.

Etter middagsgjester og rydding av kjøkken etter dette, laga vi kaker og bursdagsbord på 1-2-3.
På 4-5 timar inkl. pausar var alt i boks.

Det er trass alt den 13-14 barnebursdagen vi stellar i stand til, og team Lerum er efektive når det gjeld. Når vi i tillegg fekk god hjelp av middagsgjestene, gjekk det som ein leik.

Så no får vi håpa at 7-årsdagen svarar til forventingane, og at vèrgudane (og veggudane om dei finnst?) blir med på team Lerum dei òg.

Gratulerer med 7-årsdagen Martha i farta!

Uvèrshelg?!

VINTER I NORGE :-)

Tidleg i veka meldte yr.no og avisa om at laurdag og søndag ville det bli vèromslag, og difor stor rasfare m.a. her inni fjorden.

Men, som vanleg, har ikkje varsla slått heilt til.

Varmegradene kom mykje seinare enn varsla, regnet likeså.

Utpå ettermiddagen i dag, kom meldinga om at no var vegen

langs sørsida stengt, og det var uvisst når det vart opna att

måndag.

Ungane jubla, for då blir det heimedag i morgon.

Og det inneber at dei kan vera oppe lenger i dag.

Det eine dreg det andre med seg....

Mor i huset, som har vore heime frå arbeid heile sist veke, tykkjer berre det er upraktisk.

Ho vil på jobb, koma i gang att etter ei veke på sofaen!

Men vi lyt gjera det beste ut av det.

Ungane og pappan har bygd ein snømann på 4,64 meter og to snøborger - klare til krig!

Og mor har kosa seg og laga invitasjonar til 7-årsdag på onsdag - betre seint enn aldri.

Godt nytt år!

Vi gjekk inn i det nye året med godt folk, god matog drikke, spel og artig quiz.
Dei to eldste og dei to yngste i grenda var her, vi hadde det så triveleg og kvelden gjekk alt for fort. Ein veldig god start på 2011, måtte fortsettinga bli like god!

Nokre få julebilder

Vi har vore sløve med fotografering i jula, dessverre. Men her får de no sjå nokre av dei vi har..

Juletreet vart tradisjonen tru pynta lillejulaften.

Litt pjuskete tre, men med mykje og fin pynt vart det reint staseleg!

Julenissane var ein höjdare ;-)

Saueribba og tilbehøret smaka fortreffeleg!

Forstår ikkje at fleire ikkje har fått augene opp for den!?

Hello Kitty-dama vår ønska seg, og fekk, masse Hello Kitty-greier.

Strålande fornøgd, som de ser!

Zhu-zhu marsvin stod høgast opp på ønskelista,

og nissen, kattene og slekta hadde fått med seg det.

Fleire pauser under pakkeopninga for å setta saman nye deler til banen

eller prøva nye marsvin :-)

Kjølerom og kjøleskåp er fulle av godt pålegg, og vi har vore heldige og hatt fire "brødmatselskap", så kjekt å møtest over matfata.

Her er dei flotte ungdommane som har flytta hit til grenda nede på kveldsmat 1. dagen.

Får skjerpa oss litt med fotograferinga vidare utover i jula!

Så lenge: God jul!

Verdas flottaste røvar-nissar

Julaften kom det tre nissar listande inn kjøkkeninngangen.

Dei hadde med seg Zhu zhu-marsvin og -bane, og ungane var glade.

Skjeggveksten var det ikkje noko å seia på, men dei lukta vêr.......

Vi vaksne - og nissane - lo og lo.

Ein god start på ein super julekveld!

Jul med senka skuldre og avslappa stemning

"Noko må vi ha gløymt", har vore gjengangar-replikken her i huset dei siste dagane.

For her har det vore lite kav og stress, god tid i sofaen med tv, aviser, blad og data den siste veka. Pakkar har (stort sett) vore klare til avlevering når folk har stukke innom oss - har hatt mange panikk-innpakningar på kjøkkenet medan kall og ungar har underheldt gjestene....

I år har det vore god tid til å settja seg ned og ta i mot besøk og til og med ha juleverkstad heile onsdag med ungane og gode vener.

Julekorta -og hovudpakkane- vart sendt i god tid før postens fristar.

Og det har vore så kjekt å henta posten her og sjå og lesa om familane til vener og familie. Vi set stor pris på julehelsingane som finn vegen til postkassen vår. Fotokorta heng vi fortsatt opp, men no når åkledet er borte heng vi dei på silkeband i staden. Julestrømpene ligg klare på vedkassen som farmor og farfar laga, og som eg har arva!

På bua hadde dei julerose då eg var innom etter siste arbeidsdag i 2010. Eg har høyrt og lese om rosa, og etter litt god reklame frå butikksjefen, vart ho jammen med i handlekorga. Ho stura litt første døgnet, heilt til eg fann ut at ho var tørst. Sidan har ho stått så stronk og strak i lag med ein medteken, kattespist dompap....

Stua vår har vorte lang, etter byggeperioden, fantastisk med så god plass! Julevimpelen er kome opp. På benken under har ungane laga seg ein eigen nisse-koloni rundt pepparkakehuset (som har mista både tak og pipe, egentleg.... men som får sett på taket kvar dag, og så glir det nedatt). Treet er litt pjuske, men med fin pynt og pakkar under, ser det ikkje så verst ut. Utanfor kan de så vidt skimta lysa frå treet på verandaen - det vart endeleg oppsett i dag!

På bordet står lysestakane som farfar har dreid. Hugsar eg fekk dei. Då hadde han, nennsomt og nøyaktig, laga mange slike stakar til borddekking for juleklubben til famor. Eg fekk to, og tvinga han til å skriva under dei, Iver 1991 har han skreve. Flotte stakar frå ein flott farfar! Og så kjekt å ta dei fram kvart år og tenkja på han.

Desse to nissane- og ei nisserot til - har eg fått av farmor og farfar. Ho har strikka og dekorert, han har sanka og skore til rota. Desse må sjølvsagt fram kvart år.

Farmor er ein kløppar med tråd, både med symaskin, strikkepinnar og heklenål. Og her er ein løpar ho har hekla til meg. Eg har òg fått raude hjertekuvertbrikkar og enno ein raud løpar ho har hekla til meg.
Farmor og farfar har altså æra for mykje av julestemninga mi. Det ringde eg og sa til dei i helga når eg fann fram att julepynt og juledukar. Men dei er ganske smålåtne begge to, og meinte det var eg som trylla fram stemninga ved å dandera.....
Eg er i alle fall glad for alt handverket eg har fått frå dei, både i tre, stoff og garn!Tilbake til den usedvanleg rolege førjulstida, eg veit egentleg kvifor det har vorte slik...

Vi, og eg i sær, har vorte mykje flinkare til å prioritera det som må gjerast framfor det som burde vore gjort.
Det har ikkje vorte vaska rundt, gnikka og polert.
Loftet er heilt kaos, men gjestar held seg vel i første etasje, og der er det koseleg og ganske ryddig!
Lite av dei tradisjonelle sortane er i boks, men vi har no over sju slag lell.
Gjærbaksten har uteblitt, men fekk kjøpt halvsteikte brød på bua i dag - går heilt fint.
Alle får gåver, men vi har ikkje talt kroner, berre kva vi trur folk vil bli glad for.
Og heimelaga og sjølvlaga er suverent å både få og gi!

Så slik har vi tenkt og gjort i år. Veldig enkelt og veldig avslappande, men det krev litt vilje for å ikkje gjera alt eller noko ein burde.

Altså ikkje ei perfekt husmor-førjul, men ei super familie-førjul.
Dette skal gjentakast neste år òg!

God jul alle saman frå ei mislykka husmor men fornøgd Hilde