Nokre få julebilder

Vi har vore sløve med fotografering i jula, dessverre. Men her får de no sjå nokre av dei vi har..

Juletreet vart tradisjonen tru pynta lillejulaften.

Litt pjuskete tre, men med mykje og fin pynt vart det reint staseleg!

Julenissane var ein höjdare ;-)

Saueribba og tilbehøret smaka fortreffeleg!

Forstår ikkje at fleire ikkje har fått augene opp for den!?

Hello Kitty-dama vår ønska seg, og fekk, masse Hello Kitty-greier.

Strålande fornøgd, som de ser!

Zhu-zhu marsvin stod høgast opp på ønskelista,

og nissen, kattene og slekta hadde fått med seg det.

Fleire pauser under pakkeopninga for å setta saman nye deler til banen

eller prøva nye marsvin :-)

Kjølerom og kjøleskåp er fulle av godt pålegg, og vi har vore heldige og hatt fire "brødmatselskap", så kjekt å møtest over matfata.

Her er dei flotte ungdommane som har flytta hit til grenda nede på kveldsmat 1. dagen.

Får skjerpa oss litt med fotograferinga vidare utover i jula!

Så lenge: God jul!

Verdas flottaste røvar-nissar

Julaften kom det tre nissar listande inn kjøkkeninngangen.

Dei hadde med seg Zhu zhu-marsvin og -bane, og ungane var glade.

Skjeggveksten var det ikkje noko å seia på, men dei lukta vêr.......

Vi vaksne - og nissane - lo og lo.

Ein god start på ein super julekveld!

Jul med senka skuldre og avslappa stemning

"Noko må vi ha gløymt", har vore gjengangar-replikken her i huset dei siste dagane.

For her har det vore lite kav og stress, god tid i sofaen med tv, aviser, blad og data den siste veka. Pakkar har (stort sett) vore klare til avlevering når folk har stukke innom oss - har hatt mange panikk-innpakningar på kjøkkenet medan kall og ungar har underheldt gjestene....

I år har det vore god tid til å settja seg ned og ta i mot besøk og til og med ha juleverkstad heile onsdag med ungane og gode vener.

Julekorta -og hovudpakkane- vart sendt i god tid før postens fristar.

Og det har vore så kjekt å henta posten her og sjå og lesa om familane til vener og familie. Vi set stor pris på julehelsingane som finn vegen til postkassen vår. Fotokorta heng vi fortsatt opp, men no når åkledet er borte heng vi dei på silkeband i staden. Julestrømpene ligg klare på vedkassen som farmor og farfar laga, og som eg har arva!

På bua hadde dei julerose då eg var innom etter siste arbeidsdag i 2010. Eg har høyrt og lese om rosa, og etter litt god reklame frå butikksjefen, vart ho jammen med i handlekorga. Ho stura litt første døgnet, heilt til eg fann ut at ho var tørst. Sidan har ho stått så stronk og strak i lag med ein medteken, kattespist dompap....

Stua vår har vorte lang, etter byggeperioden, fantastisk med så god plass! Julevimpelen er kome opp. På benken under har ungane laga seg ein eigen nisse-koloni rundt pepparkakehuset (som har mista både tak og pipe, egentleg.... men som får sett på taket kvar dag, og så glir det nedatt). Treet er litt pjuske, men med fin pynt og pakkar under, ser det ikkje så verst ut. Utanfor kan de så vidt skimta lysa frå treet på verandaen - det vart endeleg oppsett i dag!

På bordet står lysestakane som farfar har dreid. Hugsar eg fekk dei. Då hadde han, nennsomt og nøyaktig, laga mange slike stakar til borddekking for juleklubben til famor. Eg fekk to, og tvinga han til å skriva under dei, Iver 1991 har han skreve. Flotte stakar frå ein flott farfar! Og så kjekt å ta dei fram kvart år og tenkja på han.

Desse to nissane- og ei nisserot til - har eg fått av farmor og farfar. Ho har strikka og dekorert, han har sanka og skore til rota. Desse må sjølvsagt fram kvart år.

Farmor er ein kløppar med tråd, både med symaskin, strikkepinnar og heklenål. Og her er ein løpar ho har hekla til meg. Eg har òg fått raude hjertekuvertbrikkar og enno ein raud løpar ho har hekla til meg.
Farmor og farfar har altså æra for mykje av julestemninga mi. Det ringde eg og sa til dei i helga når eg fann fram att julepynt og juledukar. Men dei er ganske smålåtne begge to, og meinte det var eg som trylla fram stemninga ved å dandera.....
Eg er i alle fall glad for alt handverket eg har fått frå dei, både i tre, stoff og garn!Tilbake til den usedvanleg rolege førjulstida, eg veit egentleg kvifor det har vorte slik...

Vi, og eg i sær, har vorte mykje flinkare til å prioritera det som må gjerast framfor det som burde vore gjort.
Det har ikkje vorte vaska rundt, gnikka og polert.
Loftet er heilt kaos, men gjestar held seg vel i første etasje, og der er det koseleg og ganske ryddig!
Lite av dei tradisjonelle sortane er i boks, men vi har no over sju slag lell.
Gjærbaksten har uteblitt, men fekk kjøpt halvsteikte brød på bua i dag - går heilt fint.
Alle får gåver, men vi har ikkje talt kroner, berre kva vi trur folk vil bli glad for.
Og heimelaga og sjølvlaga er suverent å både få og gi!

Så slik har vi tenkt og gjort i år. Veldig enkelt og veldig avslappande, men det krev litt vilje for å ikkje gjera alt eller noko ein burde.

Altså ikkje ei perfekt husmor-førjul, men ei super familie-førjul.
Dette skal gjentakast neste år òg!

God jul alle saman frå ei mislykka husmor men fornøgd Hilde

4. søndag i advent-morgon

Akkurat no skulle eg ha vore i full sving med grønsåpe og klut, ja kanskje til og med i gang med å plassera ut nissar, englar, hjerter og stjerner...

Ungane er invitert opp til dei nyaste naboane våre på aking, og mannen er oppe i skogane på skitur for å forsikra seg om at det ikkje er sauer att oppi der.

Men realiteten er at eg fortsatt sit i sofaen -med datamaskina framom meg.

Har sjekka om venene mine (alle 499) har opplevd noko sidan i går ettermiddag, skumma overskrifter i aviser og svara på nokre adventskalenderar.

Denne magiske saken som oppdaterer deg på nyheter nesten før det har skjedd, er jammen meg ein tidstjuv!

Det har skjedd gradvis.

Først var datamaskina i seg sjølv med skriveprogram eit under, så oppdaga vi spela som var med.

Så vart det internett på eit smalt band, og berre til bruk etter kl 17 for då var det ikkje så dyrt med teljarskritt.

Men så vart det breie band og fri bruk, det var då eg mista tida!

For tida går ufatteleg fort når du sit og surfar frå avis til avis, frå blogg til blogg.

No trur eg at det blir jul her i huset berre med dei 40 nissane som har kome på plass, og utan at eg har moppa taket fritt for byggestøv for n`te gong. Men hadde ikkje datamaskina stått så lagleg til for bruk, så hadde nok tida strekt betre til.

Men - det blir nok jul på Leri i år òg.

Og mail og aviser blir nok sjekka til og med julaften!

Så avhengige er vi her på garden.....

Vips, så var det 3. søndag i advent...

Denne helga var (nesten) blank i kalenderen.

Jødde me, kor godt det er med slike helger!

I går fekk vi besøk som var med på å laga litt julesaker og åt graut i lag med oss.

Sidan spisebordet var omgjort til juleverkstad, måtte grauten etast på kjøkkenet.

Jammen var det plass til 9 grauttallerkenar og menneske rundt kjøkkenbordet!

Ei av smådamene ville ligga her til i morgon.

Dei sat og pusla med juleforming til dei gjekk og la seg (alt for seint.....), og då dei stod opp att i dag var dei først ute i fjøset og i akebakken før dei atter sette seg til med nissar og englar.

No har dei nett laga lussekatter. Sirleg laga etter eit bilete eg fann i Norsk Ukeblad.

Ingen av dei likar egentleg rosiner i bollar, så etter å ha laga nokre regelrette, byrja dei med unntaka ; utan rosiner!

Om de ser godt etter, kan de nok lesa kva "namn" dei har laga. sjå på den lange bollen.

Norsk skrivemåte går fint!

Og slik ser det ut på spisebordet etter at juleprinsessene har forlatt åstedet for å dansa til HØG musikk på loftet. For pauser lyt til, slik at målinga tørkar og kreativiteten kan få utløp i heile kroppen.

Dei kjem nok snart nedatt for å laga meir. Heldige er besteforeldre, tanter, onklar og naboar til desse jentene. Dei får nok mykje fint til jul!

For vips, vips, så er det fjerde søndag i advent. Men i dag lyt vi tenna tre lys og synga tre vers, så vent og fint vi kan!

Adventsmorgon

Å stå opp første søndag i advent er nesten like kjekt som å stå opp julaften.

Å koma ned til ei stove og kjøkken som berre er opplyst av adventsstake og adventsstjerner er heilt spesielt. Og veldig koseleg.

Så koseleg at b-mennesket Hilde stod opp før hanen gol (no skal det seiast at hanen på Leri er litt vrangsøvd), koka seg kaffe og stupa inn i blogg-verda.

Då jentene stod opp ein time seinare, forstod dei ikkje kvifor mora var oppe så tidleg. Men då hadde det vorte lyst ute, og noko av adventsmagien var borte......

Adventslaurdag i heimen

I staden for Oslo-tur, vart det heimehelg på oss. Og sjølv om mor ikkje er i toppslag, så har eg i alle fall begynt på å tømma advents-kassen. Velkommen inn for ein kikk!



Trappa ha fått søyler og gelender denne veka, så no kan vi ana korleis det blir når listene er påkomne og utskjeringar og måling er gjort.


Inne i gangen er det fortsatt panel-lager, men ein lyt gjera det beste ut av det. Stjerna er opphengt og lyktene står foreløpig i glaskarmen

Det nye raude teppet og putene er framkomne, greidde ikkje å venta lenger. Kjekt med litt fargeklattar i stova. I tillegg har vi fått hengt opp att bileta over sofaen, hadde nesten vent oss til "blanke" veggar. Gåven frå foreldra i klassen er kome på plass!

Alle pærene i staken og stjernene virka, då er eg fornøgd. Laurdagsgodt høyrer sjølvsagt med i dag.

Når eg dukka ned i advents-kassen, hadde vi faktisk litt lilla stash frå før. Kjekt å sjå att gamle og unge vener ;-)

Til slutt eit lite bilete av juleutstillinga til storjenta. Ho har strødd roseblad rundt, men det vises ikkje så godt. Eg har sagt at nissane lyt venta eit par veker, men reglar gjeld ikkje på hennar utstilling! Basta!

God adventstid!

Ein usedvanleg god start på arbeidsveka

Då eg kom halsande tilbake på jobb etter IKT-møtet i dag, låg det ein stor, fint innpakka pakke på kontorpulten min.

Kunne ikkje forstå kven det kunne vera frå, eg har jo ikkje bursdag før neste veke.

Måtte lesa kortet først, og så var det frå foreldra til elevane mine.

Med takk for teater og elles. Så kjekt å høyra!!

Dei hadde spleisa på ei adventsgåve med innhald heilt i Hilde-stil: Hjerter, lilla og sølv.

Har egentleg lyst å leggja duken på bordet og setta lysfatet på og tenna lyset...

Men eg lyt venta til adventstida er her. Trur eg.....

Skal i alle fall tenkja på 12 elevar og 24 foreldre når eg ser på duken, fatet, lyset og pynten!

-Og eit fabelaktig artig og underhaldande sirkus-teater med verdas beste elevar i hovudrollane!

A room without a view.....

I ei helg som til no har vore tettpakka med program, var det deilig med ein roleg søndagsmorgon med fyr i ovnen, kaffe i kruset og kokosbolle frå IKEA. Dei er gode dei!
Men utsikta frå stova er ikkje den beste akkurat i dag, som de ser. Framom stoveglasa står ein Ektorp som vart med heim frå Bergen i går. Fem timar køyring kvar veg er ikkje noko å snakka om når mor vil på IKEA....

Vi skal montera hjørnesofaen i ettermiddag, men først skal vi på konsert og høyra kva jentene har lært på korhelg og så blir det farsdagsbuffèt før alle fire landar i heimen.
God søndag!

Maestro og akutt lengsel

Då vi kom inn dørene her etter svogerbursdag, starta programmet Maestro på Nrk1.
Denne gongen var det orkester med kor dei skulle dirigera.


Og der kom perlene på rekkje og rad....
Requiem og messer som eg har vore med og framført.


Og eg tok meg i å sakna korlivet noko inni hampen.
Eller, eg er med i eit knallkjekt kor,
eg sakna eit kammerkor som framfører store verk med orkester og solistar.


Eg saknar Peder, Tor og Knut.
Eg saknar partitur, øve-cdar, manglande sjølv-øving, frustrerande prøvar og hektiske øveperiodar.
Eg saknar diskusjonar om råd og knep når alle førstesopranane hadde skrantne stemmer.
Eg saknar turane rundt omkring i fylket i bil med lunsj i benkeradene og middag i dåpsrommet.
Eg saknar å laga stor og flott musikk i lag med kor og orkester.

Og no er det snart 1. søndag i advent og Juleoratoriet av Bach. Det heng tett i hop. No syng eg med dei beste musikarane, solistane og koret i verda denne søndagen. Kvart år. Det er eg og cden den dagen i året. Eg syng av full hals, og for kvart år må eg innsjå at songforma ikkje er på topp. Ikkje når eg dei høgaste tonane like lett og ubesværa og ikkje held eg ut fraseringane som er avmerkt i notane mine.

Så det er vel kanskje til sjuande og sist bra at ting er som dei er. At eg går her på garden og syng med mitt nebb medan eg reknar med at magien blir skapt i Nordlandet kirke i år òg. Der er førstesopranane i strøk og held både ut frasane og når opp til tonane!

Men eg lengtar no etter det likevel.....

Pustepause..

I kveld då eg var oppe og las for jentene, snakka vi som vanleg om kva som skulle skje i morgon.

Tysdagar er det barneidrett, men for første gong var begge enige om at dei ikkje ville i vegen i morgon. Dei hadde vore på tur dit dei skal mange gonger. Dei ville vera heime.

" Er de sikre på det då?" spurde eg.
" Ja, vi vil vera heime."

" Ok, då er det ikkje noko som skal skje i morgon etter skule og leksehjelp. Då kan vi kosa oss heime alle fire då i morgonkveld.!"

"Å, det blir koseleg......." utbraut yngstejenta heilt spontant.

Kanskje det er godt for alle med ein pustepause i programmet.....

Det er det! Gler meg til i morgon ettermiddag :-)

Søndagstur i grenda

I dag har heile familien vore på søndagstur frå den eine enden til den andre i bygda vår.

Kanskje 6 kilometer etter vegen, med ein kilometers avstikkar opp i øvrebygda.

På denne turen hadde vi 10 stopp.

Det er berre 10 bebudde hus med til saman 22 fastbuande her i grenda. Kan skjønna det er alt for lite!

Tenk berre på slik det var i gamle dagar. Då var det folk i alle hus og tenestefolk på alle gardar.
Det var liv og røre med butikk, skule, telegraf, post, skomakar, dampbåt.....

Jammen hadde det vore artig å skrudd tida tilbake, vore med her for 50-100 år sidan.

Fått møtt alle desse fargerike personane eg har høyrt så mykje om.

Men eg får ta til takke med 2010 og ei flott grend med plass til mange fleire.

Velkommen til oss! :-)

Snik-hjertifisering...

Etter to dagar i senga og på sofaen, kjennes formen heldigvis litt betre. Så eg står han vel av denne gongen òg! ;-)


Medan eg sat her i sofaen i min sjukelegheit og såg meg i kring i den "nye" stova vår, fann eg ut at til trass for at alle bilete og anna pynt fortsatt ligg nedpakka, så har hjerta jammen sneke seg inn likevel... Her skal de få sjå kva eg fann:



Hjerteøskja med telys er framme heile året til trass for at det egentleg var jule-stash. Praktisk å ha telysa framme heile året utan å gøyme dei bort i ei skuff eller eit skåp.





Dette hjertet tagg eg til meg då vi var heime hos mamma på haustferie. Ho hadde hengt det vekk, og då eg spurde om eg kunne få låna det, så fekk eg det. Triveleg med lys i glasa!





Til og med taklampa på stova har hjerte her i huset. Egentleg skulle denne lampa vera i gangen, men etter at ingen forslag til stovelamper gjekk gjennom familierådet, fann vi ut at denne skulle få koma inn i varmen. Finn vi ei hengelampe over stovebordet, skal vi nok finna ein ny, god plass til hjertelampa!



På muren har vi laga eit barnsleg hjerte... Det kan vera bra med ei påminning om dette når kvardagen er som striast! Utruleg at vi kom på dette heilt sjølv, vart litt kult!?

Dette er egentleg to hjerte, eg fann dei då eg var på husmorferie på Jessheim. I ein kjekk butikk på senteret hadde dei både det store og det lille hjertet. Men bak kassa hadde dei vridd og klipt og sett dei saman til eitt hjerte. Då ho bak kassen høyrde kva eg og søstra mi snakka om, sa ho at eg kunne få kjøpa det som hang på veggen. Ho hadde tid til å laga til eit nytt. Hipp hurra og no heng det over omnen vår, og passar så fint!

Oi, no ser eg at ledninga til brannvarslingsanlegget heng laust her. Og at markeringstapen fortsatt er på panelet.... Men det blir vel alt til sjuande og sist!

Ei glede kjem sjeldan aleine

I går kom kallen heim frå skulekøyring, og overraska meg med å gi meg ein fin orkidè.

Verkeleg overraska meg, for det var jo ein heilt vanleg tysdag!

Seinare på kvelden fekk eg eit flakslodd av same snilling, som eg ikkje vann på, men lell da. Eg er alltid glad når han kjem stikkande med eit skrapelodd, eg.

No står orkidèen så fint i den nye, breie, fine glaskarmen (som forøvrig skal få seg eit strøk måling eller to, når målemotivasjon kjem tilbake).

To stykk katter ligg som slakt på sofaen, og er usedvanleg avslappa.

Ungane leikar kjekt med kitt i lag med ein kamerat og eg registrerar prøveresultat i matte og lesing (les:surfar på nett).

Alt dette medan vi ventar og gler oss til han far kjem att frå sauesank! :-)

To gleder på ein gong --> dobbel glede :-)

Hurra oss rundt!

I helga har vi som seg hør og bør for ein stor 8-årsdag, feira i tre dagar til ende.

Fredag inviterte ho reservebesteforeldre og -oldemor og tre ferieungegjestar på pizza og salat før kakene kom fram, mellom anna sjølvdekorerte muffins.....

Etterkvart kom limbostonga fram, og innimellom gjekk jenkaen så det knaka i golvbjelkane! :-)

På sjølvaste bursdagen var det sjølvsagt kake og gåver på senga, og utpå ettermiddagen kom skulevenninner, og då skulle det serverast hamburger og pommesfrites.

Søndag kom onkel, tante og søskenbarn med ein kavaler, og då bestemte mamma og pappa at det måtte bli "ordenteleg mat" : baccalao.

Ei flott helg med gode lag og ein vel feira åtteåring!

Graset er grønnare på den andre sida av gjerdet

Og då heftar det ikkje om ein lyt gå i vatn til magen gjennom ei miserabel flo-gjerding.

For "naboen har betre gras enn bonden vår."

Men i kveld møtte nabosauene sin overkvinne (les: meg!) , og måtte fint tusla heimatt same vegen som dei kom.

Då hadde fjæra kome, så returen var meir behageleg enn turen til.

Så er det berre å håpa at turen ikkje freistar til gjentaking.....

i alle fall ikkje før bonden her har reparert gjerdinga:-)

Hylle-hyllest og hylledag

Hylla er undervurdert, men ho gjorde underverk for kontoret - og meg!

Kontoret mitt - og dei andre romma i 1. etasjen har vore ferdige sidan i vår, men utan hyller var dei null verdt!

Denne veka kom det opp fire hyller på kontoret mitt, stor takk til mine to snekkarmenn!
Og på 1-2-3 vart det eit visst system i kaoset som har råda der. No skal det seiast at eg slett ikkje er fedig med systematisering, sortering og kasting, men eg er på god veg!

Velkommen inn for ein kikk!

Dette er utsikta frå kontorstolen, kan ikkje klaga på den!


Denne hylla er laga av eit bordkledingsbord som faktisk var festa på akkurat denne veggen og nesten på same plassen då den var yttervegg for vel eit år sidan. Har berre vaska ho, og høvla litt - er grueleg fornøydd med denne hylla! God og brei, tjukk og solid! (Vart nesten ein beskrivelse av kontorets eigar ;-)

Denne hylla og dei to under, er òg gjenbrukshyller. Dei kjem frå kjøkkenet og er så gode som nye. På øvste hylla har eg plassert sysakene, som eg (desverre) reknar med kjem til å bli lite bruka..

Kjøpmannsdisken stod på stabburet her før og inneheldt mjøl og gryn. Musa har gnagd seg hol inn både framme og bak, og knottar manglar på mange skuffer. Men eg tykkjer det er eit sjarmerande møbel, om enn litt monumentalt på eit lite kontor....

Til slutt lyt eg syna eit bilete frå rommet over gangen. Trur de ikkje bua fekk hyller same dag som kontoret mitt. No kan vi snart pakka opp att alle kjøkkenmaskiner og -dupedittar, det er fort vi fyller ei bu!

Trur eg innfører hylla sin dag her på garden! Ho fortener oppmerksomheit!

21. august vil eg feira den, då kom det hyller på kontor og bu her i år.

Hipp hurra for hylla!