Advent , slik ein 7-åring ser det.

ADVENT

VISTE DU AT ADVENT BETYR VENTETID?
ADVENT KAN OKSO BETY AT VI VENTER PÅ AT JESUS BLE FØDD .
VI SIER AT DET ER 4 SØNDAGA I ADVENT.
Å NÅR DI 4 SØNDAGENE HAR GÅT ER DET NESTEN JUL.
ADVENT FARGEN ER LILLA.VER SØNDAG I ADVENT TENNER VI EIT LYS.

EG SYNES ADVENT ER EIT FINT ORD, SYNES DU??

29. DA BEGYNER ADVENTEN I ÅR, DET ER EIN SØNDAG...
I ADVENT DA ER DET MANGE YRKE SÅ HAR DET TRAVELT, FÅREKSEMPEL POSTMANNEN
HELER POSTJENTE...
EIN AV NASJONAL FARGENE I NORGE ER BLÅ, MEN LILLA LIGNER GANSKE PÅ BLÅ .
MINE YNDLINGS-FARGER ER ALLE NASJONAL FARGENE PLUSS LILLA.

EG HAR ADVENTKALENDER HAR DU???
EG FÅR EIN PRESANG VER DAG ETTER MIDDAG FREM TIL JULAFTA.
ETTER MIDDAG KAN FÅREKSEMPEL VERE HALV FIRE.
VI HAR OKSO EIT LYS SÅ VI TENNER EIN CENTIMETER KVAR DAG FREM TIL JUL.

Helse Førde sparar pengar

Somme tider kan ein bli litt oppgjeven av byråkratiet, eller ganske ofte om ein orkar.

Min sak er at eg søkte om å få eit forstøvarapparat i samband med min ganske nyerverva astma. Det var forresten ikkje berre, berre å laga ein slik søknad, men det er ei heilt anna sak.

I alle fall fekk eg avslag på søknaden, utan nokon grunngjeving.

Fordi eg har ein snill, astmastisk lillesøster, fekk eg låna apparatet hennar, og det har stått her sidan, og vore i bruk dann og vann. No om dagen dampar det ut ventolin til meg fire gonger om dagen, til stor hjelp for åndedrettet mitt.

Men kva hadde skjedd om eg ikkje hadde hatt eit slikt apparat i hus?

Jau, eg hadde vore hyppigare på legekontoret, kanskje sykehuset og eg hadde vore meir borte frå jobb. Blir fort pengar av slikt!

I tillegg er apparatet ei slags sikkerheit for meg som bur nesten 4 mil unna legesenteret, ein blir ikkje mindre tett av å vera redd for å ikkje kunna få pusta....

Men dette kunne altså ikkje Helse Førde unna meg å få låna frå Hjelpemiddelsentralen.

(Enno dei spanderte både sykebil, luftambulanse og nokre døgn i sykehussenga på meg før astmaen vart kontrollert. Stod ikkje på det!)

Er det ikkje ein logisk brist ein eller annan plass?

Eit slikt apparat er ei billeg investering for dei, og ei viktig ei for meg.

Kva er problemet?

Ikkje rart Helse Førde går med underskot i alle fall!

Fluge på veggen

Vart sittjande å tenkja på kva i all verda somme 50-70-åringar (og yngre folk òg) brukar tida si på, ingen har det visst så travelt som dei. "Har ikkje tid til slikt" er omkvedet.

Husa deira er ferdig oppussa, påbygd og innbudde.
I huset bur berre ein eller to, godt vaksne, personar.
Mange er ikkje ute i det ordinære arbeidslivet.

Likevel har dei ikkje tid til organisasjonsarbeid, dugnadar, sosiale samankomster,
sjå på Tv, delta i nærmiljøet.
Det er då lysta til å vera fluge på veggen kringom ei vekes tid kjem snikande...

Og eg stiller gjerne ein vegg til disposisjon for dei òg, om dei vil sjå kva som skjer her i huset.
Men då lyt dei rekna med

• rot og støv,
• forsøk på grensesettjing og oppdraging (ofte ikkje lydlause sekvensar),
• logistikk som endrar seg heile tida (takk og pris for mobilen),
• leksekampar (heller ikkje så lydlaust, ofte)
• middagsplanlegging - potetkoking om morgonen, resten av middagen når alle er heime (begge to er i arbeid, )
• vasking av hender og pussing av tenner, ungar som ikkje får sova..
• for tida bur vi på ein anleggsplass p.g.a. påbygging

Men òg ein heim der alt dette er uvesentleg, egentleg. Her har vi i grunnen tid til det meste vi har lyst til;

• vi tek gjerne i mot besøk om huset står på hovudet, eller enno betre: reiser frå heile rotehuset.


• Vi er meir enn gjerne sosiale om det høvet byr seg,


• Ungane får vera med på det dei vil av fritidsaktivitetar (enno i alle fall) - men det betyr 2 mil tur/retur fleire gonger i veka etter arbeid


• Vi har tid til å delta i organisasjonar og grupper


• Vi tykkjer dugnad er viktig, og deltek så sant det går an


• Vi er innom nett og e-post mange gonger om dagen,


• Vi ser det vi har lyst til på tv og les så mange aviser vi vil


• Har vi lyst på noko godt til kaffen/ barne-tv`n bakar vi eitt eller anna


• Og det beste er: Vi har tid til overs!

Kanskje vi to flugene kunne hatt eit evalueringsmøte etterpå?

Skal tru kva konklusjonen ville ha vorte???

Jippi!! Kamera på veg....

I kveld har eg forska på kamera; teknisk og økonomisk.

Og då mannen kom heim frå feiring av bror sin,

måtte han setja seg ned og godkjenna valga mine.

Det vart to kamera når vi først skulle handla;

eit Canon speilreflekskamera EOS 500D

og eit Olympus kompaktkamera FE-5020.

Det har vore uvant og tungvint å ikkje ha eit kamera som fungerar,

det gamle kompaktkameraet vårt står på full zoom...

Blir ikkje mykje oppdatering på heimesida vår slik.

Hipp hurra for netthandel for oss som bur langt unna fotobutikkane!

Vi gler oss til begge kjem i hus. Kanskje til helga??

Nokon som har erfaringar med desse to forresten? Helst positive då :-)

Kveldsdrink?!

Kreativi-

teten har ingen grenser her i huset innimellom.

Det siste på fronten vart til medan damene var aleine heime og er ei enkel, men oversiktleg oppskrift på "Biolis Best".

Håpar det vi smaka!

Omtikking

Klokka tikker, tida går, som kjent.

Men i natt tikka den for dårleg, og måtte gjera oppatt ein times arbeid.
Slark og slurv løner seg aldri - ikkje for klokka heller!

Benjamin Franklin lanserte idèen om omtikking for 225 år sidan, Norge hoppa på i 1916. Men kanskje det ikkje var så vellukka?

I alle fall vart det ikkje prøva att før i 1940, då varte imidlertid sommartida i 2 år og to månader.

Vi i Norge har hatt ein times forskyving på døgnet sommar og vinter sidan då med to pausar på 13 og 14 år - mon tru om det var familiar med små ungar som protesterte hardt mot regjeringa?

Bakgrunnen for forslaget til Franklin var å spara energi, men no er vel heller fokuset på dagslyset ute - ikkje om vi må slå på ei lampe inne for å sjå?!

Veit ikkje heilt kva eg meiner om klokkeflyttinga no, men før om åra har eg vore i mot!

Då ungane var mindre og foreldra måtte gjera ein innsats for ernæring og sikkerhet, var desse søndagsmorgonane laaange - og trøytte! I dag var det i grunnen ok å stå opp klokka 8! Altså 9...

Muleg klokka gjer ein god jobb og ikkje treng å driva med slurv verken vår eller haust. Kan ho ikkje berre putla på??

Søndagsmorgon-lykke

Å liggja på armen til mannen under den varme dyna

medan ein har god tid til å prata om dei små episodane og replikkane ein plutseleg hugsar frå veka som har gått.

Å kunna stå opp når ein vil og elles ikkje ha program for dagen,

det er søndag og lykke på sitt beste!

Lykkeleg isolert!?

Første dag i første haustmånad, og aldri har eg sett meir regn på ein ettermiddag.
36 mm dei siste 12 timane, seier husbonden som akkurat har sjekka nedbørsmålaren.
(På jobb snakka dei forresten om eit vêrmerke som sa at det vêret vi har i dag, slik vil vêret vera framover...så veit vi det)

Jentene og eg køyrde utover med augene på stilk etter arbeid, skule/besøk og barnehage;
låg det steinar, tre eller vatn i vegen? Men alt vi såg var brune elvar -både der dei brukar å vera og på stader eg aldri har sett ein vassdråpe før. Fjorden var brun heile vegen ut. Groa attmed huset var òg stor og stygg.
Far i huset stod feberheit i ytterdøra og var glad alle dei tre jentene hans kom seg heim til kvelden.Og når han er bekymra, er det som regel noko i det. Lytt til erfarne bebuarar!!

Kort tid etter var vegen stengt både innom oss og utom oss, så no er vi isolerte. Men kva gjer det? Ingen har tenkt seg ut på vegen likevel. TV, telefon og internett virkar igjen og straumen har ikkje vore borte. Grisar og kyllingar har fått mat og drikke, folket likeså.
Alt vel med oss mellom rasa! Den største bekymringa er om eg rekk 1. time, og om barnehagejenta kjem seg oppi Fortun på bursdag kl 12. Ikkje dei heilt store problema altså!Ungane blir i alle fall ikkje røska ut av søvnen kvart på sju i morgon! Og foreldra kan vel sikkert òg dryga litt før dei står opp.....
Det gjer seg med ein flom ein gong i blant!

På`n igjen...

Ferien er over, og kvardagen er tilbake.
Haust = mykje papirarbeid for yrkesgruppa mi.

• Vi planlegg alle fag for heile skuleåret i alle grupper vi er innom.
• Vi planlegg kva tema vi skal ha i dei ulike periodane , og kva som kan puttast inn her og der av aktivitetar og kunnskap.
• Vi planlegg rutinar og grenser, reglar og konsekvensar.
• Vi må laga klassekart -og det er ikkje så lett -, ordenselevlister, ordenselev-hugseliste, bursdagsoversikt, gløyme -eller hugseskjema, SFO-oversikt, telefonlister, blyant -og viskelærliste......Sikkert fleire òg som eg ikkje hugsar i farta.
• Vi planlegg timeplan med lærarar og assistentar, og korleis vi kan nyttast mest muleg hensiktsmessig.
• Vi planlegg ein og ein time for alle klassetrinna som er i klasserommet, og korleis vi skal undervisa eit trinn medan dei andre skal jobba med oppgåver.
• Vekeplaner må til, og møtererferat skrivast.
• vi planlegg oss mest i hel.....

Ja, etter ei og ei halv veke på jobb har eg sete på kontorstolen min alt for mange timar. 11 timars abeidsdag i snitt, tenkjer eg. Ungane har berre sett mor si tidleg på morgonen og ved leggjetid, kallen likeså. Ikkje er eg så strålande blid og opplagt heller når eg først er heime.

Men er eg ajour?? Nei, fortsatt har eg mykje ugjort før eg kan reisa heim klokka 16 med god samvittighet.

Og akkurat no merkar eg at eg blir litt bøs -og faktisk let meg provosera - når det vert snakk om dei lange lærar-feriane. For dei er jammen ikkje så lange at vi får att for alt arbeidet vi gjer!

Hadde eg hatt ork, skulle eg laga meg ei reell timeliste som eg kunne slege i bordet med når lærarferiane atter blir eit tema. Eg er heilt sikker på at vi jobbar meir enn det vi får avspasert! Og eg må innrømma at ein 8-16 jobb freistar innimellom.....


Eg vurderar på å ansetta ein sekretær og planleggar, så kan eg vera det eg likar aller best: Lærar!

Fru Lerums saftmikstur

Dei tre siste dagane har det lukta godt i huset, eg har safta!

Jau då, det er litt vel tidleg, men frysarane skreik etter meir plass, så då måtte all bær som var frosne opp - kviletida over! Posar og koppar med rips, bringebær, jordbær, tyttebær, blåbær og plommer vart tømt oppi kokaren til Emma på Sande. (Vår eigen fann vi sjølvsagt ikkje i alt rotet!)

Safting gjer seg egentleg sjølv heilt til styret med reine, varme flasker med tilhøyrande korker skal fram. Sjølv det gjekk ganske bra denne gongen.

Og no har vi vips mange flasker med saft ståande - dei ventar på kjølerommet som snart kjem.

-Om dei ikkje er oppdrukne før den tid....

Kva er dette??

Plutseleg står ein unnseleg grønnblada plante i sin finaste skrud, trur ikkje ho har blomstra sidan eg flytta til Sogn og det er vel 8 år sidan.

Det eg veit om stoveplanta er at den vart kjøpt som stikling på u-lansdsaksjonen ved Rensvik skole på slutten av 1990-talet. Då sa dei at det var ei plante frå Afrika. Ikkje veit eg.

Den har harde, tynne, taggete blad og skal vatnast oppi bladmidten. Derifrå kjem òg blomsten opp.

Er det dette som kallast papegøyeblomst, eller.....?

Er det nokon som veit noko om denne planta og kan hjelpa ?

At eg aldri lærer....

I kveld kom eg på at eg skulle baka "farmor-lefse"- tjukklefse eller mørlefse kan det visst òg heita. Det er nokre år sidan sist, og då hadde eg farmor attmed meg.

Men fornuften kobla ikkje inn i varmen: eg dobla som vanleg oppskrifta.

Det gjer eg nemleg alltid når eg bakar, filososfien min er nok:

"når eg først er i gang med mjølstøv og klisseri, er det likegodt å baka så mykje at det blir ei stund til neste gong"

Eg dobla altså alt og så kom eg til siste ingrediens: Kveitemjøl til passe deig! Attom hadde eg skreve i ein parentes: Cirka bolledeigkonsistens...... Jau...., det måtte gå gale!

Mannen i huset byrja å delta i baksten, og han rørte sikkert inn 1 kg mjøl etter at eg hadde hatt i mykje eg òg.Likevel klissa deigen seg på benken og sette seg fast i kjevle, sleikepott, sleiv og fingrar.

Og enno hadde eg ikkje byrja med det eg kvidde meg til: Kjevling!

2 - 3 mm tjukke leivar, helst like i størrelse og fasong i og med at dei skal leggjast saman to og to med fyll mellom.

-------

Enden vart likevel sein men ganske god - om ikkje lefsene vart av dei beste! Dei fleste var harde som ved og tre, men vi har to posar med gode, mjuke lefser i frysaren tiltenkt gjester: Først til mølla!

Velkommen!

Sommar..... med raud mage...

Ferie og sol = strandliv!

Vi rigga oss til der nede og smurde oss inn med faktor 20 etter alle kunstens reglar.

Mor intet unntak! Men ettersom sola skein som besatt måtte sjølv ho duppa seg litt i fjorden med påfølgande tørking (og tildels oppattvarming) av legemet.

Det eg då gløymde var at magen hadde vore gøymt under ein topp, og ikkje sett verken sol eller solkrem sidan i fjorsommar.

Så no sit eg her med sviande mage - til trass for aloe vera-salve frå ein snill nabo.

Skal tru om det blir ei god natts søvn.....det gjer ikkje saka betre at det er tettoppunder 30 grader på soverommet.

Men ein lyt no freista, som han sa Askeladden!

God sommarnatt!

Pumpeflaskas forbannelse

Vi har hatt såpe på pumpeflaske her i huset i mange år, ingen sak å få dei i gang.

Men no har vi fått tre flasker med pumpe på i hus på kort tid, og dei står no der...

Ikkje forpinna om vi får dei til å pumpa opp noko som helst.

Vi har vridd med og mot sola, trykt ned, drege opp, trylla og ganna, til inga nytte.

Så no står dei der og ser spottande på oss. Må vi absolutt ha tak i noko av innhaldet, tømmer vi det rett frå flaska med den klisne pumpa liggjande attmed.

Slik held vi vel på til vi blir sprø eller flaskene er tomme - om vi ikkje får hjelp og tips av praktikarar!

K for....?

I barndommen og ungdommen hadde eg god kontroll på alt eg skulle hugsa, trong ikkje skriva lister og notatar - hugsa det berre. Det vere seg avtalar, telefon-nummer, beskjedar eller anna. Hilde hadde kontroll! (Hugsar framleis nokre av dei to- og tresifra telefonnummera heime...)

Men då eg nærma meg 30 var det slutt på "klisterhjernen".

Eg hugsar godt korleis det starta. Eg var SFO-leiar på Seljestad barneskule i Harstad, og der var det mykje hugsa på! Hugsa eg det ikkje, gjekk det utover andre, og det ville eg sjølvsagt unngå. Ergo byrja eg å skriva på handa mi; stikkord og hugsebokstavar.

DÅ var det slutt på hugsen min. Har aldri funne han att.Så no må alt skrivast ned, og handa er ofte full av bokstavar som gjer at eg skal hugsa.

No har visst hugsalausa teke eit steg til: Det står ein K på handa mi, og eg har ikkje peiling på kva eg skal hugsa. Hugsar kvar og når eg skreiv han på, men ikkje kvifor. Mannen i huset var og med på skrive-seansen, men heller ikkje han greier å hugsa kva K-en står for.

Så om det er nokon der ute som eg har lova å gjera, sjekka eller handla noko K til.... så veit de kor langt det prosjektet er kome. Snart står ikkje K-en der ein gong...

Uverkeleg

Då eg opna ytterdøra frå kjøkkenet i morges, var det nesten slik at eg kvakk til.

Svåla med blondane sine var erstatta av ein palle, og ei gravemaskin stod parkert oppi jorddungane i tunet.

Det var sjølvsagt slik i gårkveld då eg la meg òg, men det var først i dag eg "oppdaga det".

For det er som ein draum at påbygging av vårt hus skal bli verkelegheit..

At vi skal få dei romma som skal skapa litt meir "ordning och reda" i heimen(vi trur på det til det motsette er bevist).

Bod, spisskammers, kjølerom, vaskerom, kontor og gjesterom med RIKELEG klesoppbevaringsplass. I tillegg kjem eit høgt ønska bad med litt betre plass og standard enn det vi har i dag.

Dette blir så bra!

Tenk at det er eg som sit og kikar i katalogar og blad, surfar på nettet og får gode idèar og tips -som faktisk skal brukast!!
Baderomsutstyr og møblement, fliser, panel, belegg, dører og glas...vi skal jammen kjøpa det!
Huset skal tilbake til sveitserstilen heilt og haldent, 50-talsoppussinga skal fjernast.
Det blir så fint eit lite dukkehus, trur vi.
Dette blir spennande! Eg gler meg!



PS! No kom mannen i huset (som framleis er litt skeptisk til prosjektet, mest økonomisk, trur eg) heim frå bliblioteket med tre bøker om interiør og fliser -uoppfordra! Jø, mann!
Trur han gler seg litt han òg, innst inne....

Prokrastinasjon

(prokrastinering, av gr: pro-til, kras-seinare)
Prokrastinering betyr altså å utsetja oppgåver til seinare.

Tenkte å skriva eitkvart om dette som vi er så gode på her i huset,
men kanskje eg heller ventar til i morgon?!

Trur det blir slik!

Vårsøg

No er det vår på Sørheim!!

• humlene surrar og fuglane kvitrar
• vi er meir ute enn inne om ettermiddagane
• ungane er brune av møkk -og sol
• ullkle er erstatta av t-skjorter og skjørt i vaskemaskina
• møkkjalukta brer seg og traktordur er høyrbar dagen lang
• bekkane og elvane transporterar store mengder med isvatn ned i fjorden
• trea er grøne og knoppane på frukttrea er snart klare til å brista
• nordmørsimporterte kvitveis blomstrar nede ved bekken
• sola varmer og lyser til leggjetid for ungane, og vel så det
• hannkatten er berre innom for mat og kort kvil
• lamme-banden spring ut og inn av fjøset i eitt evig rush
• hanen med haremet sitt spankulerer i tunet, og rushar av og til med lamme-banden

Måtte sola og finvêret vare ved, heile våren og sommaren med!

No skin de sol e høgste Svealiå
No bli de vår, det kjenne e so vel
De søng så trongt kring alle dalasiå
å synnåvinn han kjem å gjer me sel.
-
Når sommarn kjem, da bli det fint e fjellå,
da ska e dit å hør kår bekkjinn søng,
å kliv te topps e brattast berjestellå
å vea tort å tåg å tåbærløng.
-
E kjenne lokt tå gras kring alle haua,
å sola skin, å bjøllåin kling så kløkt.
Å tjønninn legg så blank der e ska laua
me berg ekreng, der e kainn sol me trøkt.
-
Å du, å du, kår sårt å sælt e stoinna,
når sola skin frå kvite høgdå ne.
Da væt e vår'n han e kje lenger oinna
at e får levva slik ein sommar te.
-
Da væt e vesst at bekkjinn legg å venta
poinn kalle isa me så sval ein drekk.
-Når hausten kjem å sistkveldskløva henta,
da ska e takk for sommarn så e fekk.

Påske i grenda

Påska er kanskje den tida på året at det er flest folk her.
Etter ei grovteljing i går, kom husbonden fram til at det er ca 60 påsketuristar her desse dagane, det vil seia at det er berre 1/4 som er fastbuande.
Det som er rarast, er at det truleg er berre ei med familie som er heimatt til foreldra sine - dei andre kjem til tomme hus og hytter...
Måtte 10 % av dei som nyt feriar her, busetja seg i grenda!
No får vi besøk utan at det er bilar i tunet, folk kjem innom i fjøset og huset, turgåarane er nede på vegen - og basaren her skjærtorsdag trekte 12 gonger så mykje som innbyggjartalet.
Vi vil ha fleire folk buande i grenda! Det er egentleg det det handlar om -heile tida, kvar dag heile året!
Velkommen!

Bøtteballett....

Etter litt att-og-fram-form på yngste dama (Ho spydde ein dag og var frisk den neste), torde vi ikkje anna enn å bera spybøtta opp på loftet til ho i går kveld òg.
Kosedyra måtte atter ei natt sitta på bokhylla og sjå på ho -ikkje kjekt i helga då halve dyreparken vart utsett for angrep!
Vi gjekk og la oss, men det tok ikkje lang tid før ho ropte på mamma. Trudde vi... Pappa`n inn på rommet hennar, ho sov søtt....
Det var største-jenta som var i gang med spying. Vi skifta på jenta og senga, og henta bøtta inne hos lillesøster som sov seg gjennom fleire rop, skiftingar og tørkingar.
Ut på natta vart det atter ein gong ropa på mamma, og pappan reagerte fortast -men sprang atter ein gong inn på feil rom...for storeøster sov, lillesøster derimot trong skift på seg sjølv og senga. "Bøtta var jo ikkje der, mamma...." (Dugnadsånda i natt var forresten uvurderleg!) Bøttemangelen var ein realitet, og vaskebøtta måtte til pers.
No er det behov for bøtter i alle rom der dei to sjuke ferdast (radiusen er takk og lov ikkje så stor) og i fjøset er òg den hardaste "bøttesesongen" i gang når alle fødande får einebolig.
Tenk om nokon hadde stått i tunet med 10 svarte bøtter til fjøset og 10 rosa alternativt grøne bøtter til huset......
I mellomtida har vi isboksar ståande i kvart rom- det funkar det òg. Så får sauene drikka på skift!

Helg!

Ei god arbeidsveke er over, travel men kjekk, som alltid!
Gjekk i mot mannen som kom frå arbeid.
Han hadde vore hos brødbakaren vår og kjøpt ferske brød!
Så no sit eg og et ei lunken brødskive med smør, sirup og brunost
medan eg ventar på at alle skal bli klare til avgang
på korøving for døtrene og korpsøving for frua!
Helg , og fredag i sær, er det beste eg veit!
God helg!

Lamminga startar 2. påskedag...

Med 70 gravide damer i fjøset, alle med termin mellom 13. og 30.april, er vi klare for den mest spennande tida på garden.
Men, og det er eit men, vêrane har ikkje klart å styra seg heilt, så allereie 14. mars kom lamma Ina og Fredrik til verda - og sidan har det i grunnen kome jamnt med lam. I går var det visst ca 30 kvite, små hoppetussar i fjøset. Alt har gått heilt flott -utanom dei to timane gardkjerringa var aleine med ansvaret medan bonden var i Sogndal....
På veg heim frå arbeid fekk eg telefon frå dottera om at det var kome eitt og eit halvt lam i fjøset, og ei søye var litt sjuk.... Så fekk eg melding frå bonden som òg hadde fått telefon heimafrå om nye lam -om eg kunne sjå etter i fjøset når eg kom heim.
Eg gjekk direkte i fjøset i forholdsvis fine kle, og der var det 2 nye lam -alt vel! Men i nabogarden låg det ei med eit ansikt og ein fot stikkande ut der bak... Men trur de ho pressa for å få lammet ut??
Gjekk ut for å ringja bonden og spørja kva eg no skulle gjera -der kom skulebussen på retur, fekk kava til meg sjåføren som vart med inn for å sjå på. Han drog litt forsiktig, men erklærte at dette var eit stort lam!
Så var det å ringja til gammelonkel-saueekspert-nabo med nyoperert hjerte og stivt kne. Han kom, og drog og så fekk han opp rota! Nei- ut lammet! Etter stor innsats med hjertekompresjon og livrening, greidde lammet å pusta for eigen maskin!! Hipp hurra!
I mellomtida hadde enno eit par tvillingar kome til verda, og det var lite med skiljeveggar att. Vi batt fast så godt vi kunne, og der var det jammen enno ei som viste teikn til fødsel på gang!
"Ho skrapar og ristar seg, lammet hennar ligg heilt sikkert feil!" sa gammelonkel-saueekspert-nabo. Og det hadde han rett i ..ut kom berre eit hovude i første omgang. Så måtte gardkjerringa halda og han med stivt kne og nyoperert hjerte måtte enno ein gong ned på kne og dra ut eit lam. Etterpå når alle hadde fått einebustadar til seg og lamma sine, erklærte dei gode hjelparane mine at faren var over -ingen fleire lammeteikn med det første.
Og det var jammen på tide, seks lam på ein og ein halv time er litt i overkant for ei ubehjelpeleg gardkjerring , i alle fall når to av dei måtte dragast ut!
Men tross alt var det to hyggelege ettermiddagstimar i fjøset med desse to gode hjelparane, tida gjekk fort og steminga var god, lamma såg ut til å ha det bra og mødrene likeså.
Jammen blir det kjekt når lamminga startar 2. påskedag!! :-)

Sol ute, bomba inne....

Denne helga skulle absolutt vore via til hus og heim.
Rotet ligg i haugar og dungar, golvet er seigt etter saft og anna kliss,
og det er merka stiar av gjørmesko gjennom heile 1. etasje,
gangen er full av skisko, støvlettar, cheroxar, joggesko og div kle,
badet flyt over av kle som skulle vore vaska,
på kjøkkenet er som vanleg maskina full og benken likeså.
Men kva gjer husfrua.......
riggar seg til med plastmøblementet sitt utanfor, drikk kaffe og pratar tull og alvor i solveggen.
Ho tek i mot besøk og serverar kaffe, ho går tur med ungane og byggjer sandslott, spelar spel med vener, ser på tv med kall og ungar, ho surfar på nettet og supar meir kaffe....
Så status søndag i tre-tida, er eit meir bomba hus enn på fredag
-men blid og fornøgd-og litt mindre bleik - husmor og ungar.
Huset får vi ta neste helg, om det ikkje er inne bra , men ute best då òg.....

Ettermiddagskvil

Med mann og døtre ute på aktivitet eit par timar, fann eg ut at eg skulle prøva å sova litt på sofaen. Det er ikkje noko eg driv med til vanleg, men i dag var eg så trøytt.
Eg rigga meg til med karaffel og vassglas, telefon og fjernkontrollar.
Pleddet over meg og katta Gudrun oppå der att.
Eg var akkurat sovna, då ringde mobilen - som låg utanfor liggjande rekkjevidde.
Eg opp, berre for å snakka med ingen i andre enden...før etter nokre sekund då ein innsmigrande stemme presenterte seg som om vi hadde kjent kvarandre i mange år.
Eg lukta lunta og takka høfleg(?) nei til eit kvart tilbod.
Det var då eg hadde kome under pleddet att, at tanken slo meg:
Tenk om eg hadde vunne ei draumereise eller masse pengar frå Hamar venta på meg..
Sannsynlegheita er vel ganske lita, eller.....?

Jippi! Julibad på loftet????

Tømrar Skagen og far tok på seg oppdraget med å byggja på huset vårt!
dei ringde no i kveld.
Eg som håpa på julebad på nytt bad, og no vil dei gjera det i juni!
Då blir det kanskje julibad der oppe i andre høgda??
No må vi setja oss litt i sving med søknad til kommune og bank, graving og materialval.
Går som ein dans! Dei som vil kan gjerne dansa med oss...... :-)

FERIE!!

F - fabelaktig, fri, familie, felles, frukost, fliring, fjas, fleksibel, framifrå, fryd
E - ekstemporal, egg, e-post, erting, ekskursjon, entusiasme, e-dur, ekstra
R - roleg, radio, romantikk, rangel, raudlett, refreng, rosiner, raus, raringar
I - ingenting, is, impulsiv, ineffektiv, innvilge, innimellom, inputt
E - eventuelt

Ny dag - ein betre idè!

Det gjekk eit lys opp for meg i går medan eg køyrde heim frå jobb:
Det må då vera dei få para på Sørsida i fertil alder som bør sendast ut på tur!
At det ikkje slo meg då eg skreiv forrige innlegg, forstår eg ikkje!

Sørsida har kanskje fleire tomme hus i snitt enn resten av kommunen, det er jo så fint å feriera her om sommaren. (Jammen bra dei har eit hus å bu i eit par veker i fellesferien!)
Nok om den saka, men vi har våre folk på ho!
Så for å få opp befolkningstalet, må vi sjå på dei husa der det allereie bur folk.

Eg har tru på ein utflukt for dei 3 - 5 para som kan vera aktuelle.
Premissane må vera:
- Ei veke på eit romantisk reisemål (Velg mellom 4-5 ulike alternativ)
- Ei veke fri med lønn
- Hjelp til å organisera pass av born og dyr

Kanskje idèen kan resultera i ein ny Sørsiding (heiter det det?), kanskje til og med i to?
Uansett utfall av desse turane, vil det gi småbarnsforeldra ein pust i kvardags-kavet!

Her talar vi om bygdeutvikling!

Da damene dro...... noko for oss?

Ser med eit halvt auge på TV2 medan eg sjekkar opp siste nytt her og der på internett.
Tanken på at Sørside-damene skulle reist bort frå heim og kallar, kjem snikande,
og tiltalar meg! Det hadde vore noko!
No trur eg så godt om kallane her at dei nok hadde greidd seg veldig bra,
i alle fall om Husøy representerer gjennomsnittet av sjølvhjulpne karar.
Den biten fiksar dei glatt!
Det eg tykkjer er interessant og spennande med reise-tanken min er at vi damene kunne fått reist bort ei veke og vorte betre kjende og hatt det kjekt!
Damene langs etter denne fjorden har nemleg stort sett kome rekande utover den romantiske vegen og funne seg ein kar, dei fleste har ikkje vokse opp her. Sjølvsagt nokon gode unntak!
Vi kjem frå mange ulike landsdelar - og det store utland til og med.
Og Sørsida er over 3 mil, så damene er spreidd busett, og vi er ei ueinsarta gjeng!
Tenk om vi kunne budd vegg i vegg ei veke og gått til dekka bord, fyllte glas og ryddige rom!
Prata tull og løst Sørside-problem, og kanskje nokon frå verda elles òg.
Ein fristande tanke! Dette må no vel vera bygdeutvikling?
Kanskje ei oppgåve for bygdemedarbeidaren vår??!! ;-)

Valentine... Treng vi han?

"Valentines dagen er berre noko kommersielt tull", seier husbonden kvar gong den dagen nærmar seg. Eg veit ikkje om det er ei forklaring eller unnskulding....
Eg ser heilt klart den koblinga, her skor handelsstanden seg på hjerte- (utan smerte) salg i alle mulege variantar. Og vi bit litt på.. i alle fall nokon av oss.
Men kanskje vi treng ein slik dag?
Kanskje vi treng det berømmelege sparket i rompa til å setja pris på partnaren, ikkje som mor/far, men som den vi har valgt å dela livet med, vera kjæreste med.
Berre eit teikn på at eg er spesiell for han.
Ei sjokoladeplate, kjøpt av han til meg, fordi han veit at eg likar det.
Ein St. paulia eller tullipanar som han veit eg set pris på.
Eit kort der det står svart på kvitt at han er glad i meg.
Eit synleg teikn på at han og eg har noko i lag som er heilt eineståande.
Kanskje eg skal innføra ein ny dag for oss?
9. juli kanskje... I sol, sommar, og varme,seine netter som skapt for romantikk!
Då kan han ikkje skulda på kommersen i alle fall!

Måling

Søndagar har vorte til måledagar her i huset.
Og det er huset vi måler.
Innvendig og utvendig, bortover og oppover, stadig nye mål
og til saman stemmer det sjølvsagt ikkje.
Ingen veit kva som gøymer seg attom bordkleinga og platene på 130 år gamle veggar.
Måtte teiknar-pappa likevel få teikningane sine til å gå opp på eit vis,
slik at vi har noko å visa føre oss til teknisk etat og snekkarar!

Besøksåret 2009!!!!! ?

Desverre har det vorte slik at stikk-innom-besøka har vorte færre og færre. Sjølv om eg har flytta meg nedover landet frå Harstad med stopp i Kristiansund før Sogn, trur eg trenden er den same over alt. For å få besøk må ein invitere med dag og klokkeslett, elles blir det sjeldan noko av...
Vi er, enno, heldigvis så heldige at vi har folk som stikk innom, trør over dressar, div vottar og luer og sko uti gangen og får seg ein kaffekopp medan praten går.
I går hadde kallen bursdag, verken rund eller halvrund, og dagen skulle ikkje markerast utover kake og kaffe med damene sine, sa han. Eit år eldre var ikkje noko å markera!
Men då kvelden var omme og vi rydda opp etter kaffeslabberas med 11 stk, var det ein godt nøgd jubilant som hadde hatt ein fin bursdag.
Eg trur det viktigare enn nokon gong å feira bursdagen sin - eller andre milepælar.
At det er innforstått at på slike dagar er kaffen klar, kaka er baka og huset er på skikk. Kom på besøk!
Å ha besøk som berre stikk innom er
(om huset ikkje er heilt katastrofe som det innimellom er i eit hus med ungar og foreldre som ikkje har vasking og rydding øvst på prioriteringslista)
alltid kjekt, då treng ein ikkje å ha nysteikt kake og nystrigla hus.
Ikkje misforstå, planlagte besøk er òg kjekt, det krev berre litt meir jobb på førehand.
Eg sler eit slag for å senka dørstokken, korta ned på dørstokkmila og berre gjera det.
Reis på besøk!
Her er alltid kaffen klar og snakketøyet i orden, velkommen!

Her held vi motet oppe! Står ikkje på det, nei....

Ein lyt gjera det beste ut av no-situasjonen!
Så onsdag bestilte eg meg to personlege stempel i ein nettbutikk:



Godt fornøgd så langt, så no gler eg meg til dei kjem i posten om ca to veker!!

I dag har eg hatt tilhald på kjøkenbordet i lag med ulike drikkar (for helsa) og kortutstyret (for mental helse). Det vart fem kort, ikkje verst! Temaet vart visst crisscross-kort i dag......

Januar med rumpa bar???

Ikkje denne jenta, nei!
Eg har kvar natt ikledd meg rosa ulltrikot
(du kan sjå det for deg ja?? Mannen i huset vekslar mellom å kalla meg rosa gris og michellinkvinna......) og skrytt til alle om at med influensavaksinen i kroppen vert ikkje eg sjuk, men i dag var det noko som gjekk skeis..........
Vakna med alle teikn til urinvegsinfeksjon og frostrier, og etter to timar på arbeid, reiste eg heimatt med all verdas kjerringråd og god bedring ønske.
Innom bua for å kjøpa eplecidereddikk (Fysj & fysj), og appelsinjus (for ph-en si skuld).
Svelgjer unna digre kapslar med tranebær, dei smakar i alle fall ikkje stygt om dei er store.
Som trøyst et eg ostepop eg fann i skåpet - sikkert helsebot i det òg!
Bli nok likar i mårgå!

Volumkontroll

Ein elev skreiv følgjande setning for å forklara ordet volumkontroll:

Eg var på volumkontroll i går.

Vi fekk oss ein god latter som avslutning på arbeidsveka,
men kanskje hadde det vore ein idè med ein slik kontroll??
God helg!

Is

Kva er vel betre enn is med vanilje- eller karamellsmak? Mmmm
Kva er vel verre enn is på vegar og stiar? Usch
Rart at det eitt ord på to bokstavar kan vera så motsett!

Nabokjerring til teneste

I dag ringde dei nærmaste ungane og lurte på om smådamene her i huset kunne tenkja seg å koma dit. Noko dei sjølvsagt ville, ingen er tunge å be slik her i huset.
Det var då eg hadde sendt dei ut med farens firhjulstrekkar på glatta, eg byrja å fundera på kva definisjonen på ein nabo er. For det er faktisk ei mil å køyra ut til naboungane... Det er 9-10 hus med folk i undervegs, men det er det nærmaste huset med leikekameratar. Er dei då naboungane??
I Store Norske har dei ikkje funne plass til ordet nabo.
Ved søk på nettet kom det opp mange treff om nabotvistar og nabomolekyl, ikkje særleg positivt.
Nabo er eit godt og viktig ord, jo meir eg tenkjer på det.
"Nabokjerring" har gått frå å vera ei som stikk nasen sin borti alt, nesten som eit skjellsord, til å vera noko positivt og trygt. Naboar bør vera inkluderande og tolerant. Vi vel ikkje naboar, men er i gruppa uansett. Nokon deltek aktivt i naboklubben, andre er passive. Ein kunne, som i alle lag, ønska at fleire var aktive. Men alle er med, uansett!
Verda er lita, busetjinga spreidt og bilane gode, ergo må vi utvida det gamle nabo-begrepet som innbefatta dei som hadde eigedomar som grensa mot kvarandre. Eg vil vera nabo med alle som bur på Sørsida! Eg vil at ungane mine skal kjenna alle som bur her, og at dei som bur her kjenner dei. Sjølv om det betyr bilkøyring og logistikk, køyrer eg -om det ikkje hadde vore så forbaska glatt!
Eg er gjerne nabokjerring, eg vil bry meg, eg slår eit slag og tek ein skål for eit utvida nabobegrep! Bruk meg gjerne!

Nokon - det er eg, det......

Her i huset er det gjengs at
nokon alltid heng opp jakkar som ligg på golvet og legg luer og vottar i godt merka skuffer,
nokon set alltid på plass dei koppane som skal andre stadar enn i skåpet over vasken,
nokon legg alltid reine kle på plass, nokon ryddar alltid badet når ungane har skifta frå ballerinaer til utejenter til prinsesser til tre!? (dvs brun bukse og grøn genser) til sol (gule kle sjølvsagt) til pysj og far har vore i fjøset, på drosjekøyring, i skogen, på besøk - alt på ein vanleg fredag t.d.,
nokon tømmer alltid oppvaskmaskina,
nokon går alltid ut med plastavfall og organisk avfall og restavfall,
nokon sørgjer for at det er innkjøpt laurdagsgodt til smådamene,
nokon sørgjer for at ungane har skiftekle og utekle og innekle og bakekle og gymkle og badekle i skule og barnehage,
nokon ordnar med bursdagsgåver,
nokon vaskar bordet når kaffeflekkane og kliss truar med å ha heile flat for seg sjølv,
nokon vaskar alltid kjøleskåpet og skrubbar komfyren og kring vasken og alle kjøkkenbenkane,
nokon ordnar gyldne lokkar, vaskar ansikt og ser etter at alle kle er reine,
nokon må gjera noko for å halda hus og heim i nokonlunde skikk.
Ingen har søkt på stillinga, men nokon fekk jobben
- det er visst eg som er nokon.....

Vaskerom=lykke?

No har endeleg påbygningsplanane våre...eller mest mine om sant skal seiast...vorte litt meir konkrete.
Kallen kom med målband og ville måla opp huset utvendig i går. Då gjorde det ingenting om det var 7 minus og fingrane iskalde av målbandet. Eg var blid som ei sol!
Då målingane kunne resultera i husteikning og kallen tok til å måla opp nokre rom innvendig, vart sola enno blidare!!
Kallen tek seg i å snakka som om påbygget er ein realitet, men tek seg inn att etter nokre minutt. Det er eit framsteg, før har han ikkje tenkt tanken ein gong.
Når han tek seg innatt, er imidlertid spørsmålet alltid: "Blir du noko lykkelegare av eit vaskerom då?? Når du i tillegg er gjeldsslave...... Og går det an å sakna nok du ikkje har?" Eg svarar eit høgt JA til begge spørsmåla!
Når alle har vore ute og vorte blaute slik som i dag, er eg i alle fall ikkje i tvil: Vaskerom=lykke! Basta!

Godt nytt år!

Mon tru kva året vil bringa på Leri.....på Sørheim....i Luster kommune...i Noreg...i verda....
Ingen veit, heldigvis, mange trur...... og trur dei veit.
Me tek det som det kjem her i huset, ein dag i gongen ofte.
Av og til berre time for time.
Og heldige som vi er, blir forhåpentleg 2009 òg eit godt år!
Snart er det på tide at me set oss ned og lagar ei liste over kva vi har lyst til å gjera i det nye året, ca ti punkt med store og små opplevingar for heile familien -eller berre for ekteparet. Signert av begge og lvonad om å leggja til rette for at punkta kan gjennomførast.
Veldig kjekt arbeid å planleggja og laga denne lista!
Kan anbefalast til alle småbarnsfamiliar - og sikkert andre òg!
Me treng av og til eit spark i baken...
God nytt år!